La dlieja de Sant’Ana ie tla curtina de Urtijëi. L prim iede che l ie unì numinà na capela di morc, fova tl ann 1425, ma bele dant vëniel numinà te na lëtra de ndulgënza la dlieja de Sant’Ana. La dlieja ie fata su tl stil gotich y detite iela njenieda ite tl stil baroch. Na cunfraternita n unëur a Sant’Ana se à cruzià dla dlieja per plu de 300 ani alalongia.
Tl scumenciamënt dl 16ejim secul à la cunfraternita lascià fé su n tët nuef ala dlieja tl stil gotich. Dant fova la dlieja curida da n tët de lën plutosc plat . L ciampanil cun la doi ciampanes tla forma da śën ie permò unì fat su tl ann 1799. Tl 1982 ie la dlieja dut ntëur unida dertureda su da nuef.
La gran pitura sun autere rafigurea San Gioachin y Sant’Ana cun Maria da muta. La pitura ie de Josef Anton Mahlknecht (1859). A man drëta y man ciancia de autere iel doi statues de gran valor artistich de San Gioachin y de Sant Ujep y angiuli y putti ziplei da Matthias Vinatzer (1717-1784). Beles ie nce la pitures a frësch sun l revëut dla dlieja che reprejentea la nterzescion de Sant’ Ana y l depënt dla Madona cun Bambin sun l mur dedora sëura la ntreda de dlieja.

 

La curtina
La vedla curtina ntëur la dlieja de Sant’Ana ie tl 1862 unida mudeda y ngrandida. Ntëurvia iel unì fat de majeri mures cun la nisces. Ti ani danter l 1894/95 ie la curtina unida ngrandida dl dopl cun n tòch nuef metù plu aut y cunlià cun na scela. L tòch nuef ie unì stlut ju cun na costruzion de mur cun arcades. Doi ngrandimënc dla curtina ie mo unic fac tl 1971/72 de viers de est y tl 2000 dala pert a nord.