Storia

La dlieja de Urtijëi ie unida numineda l prim iede te na lëtra de nduljënza dl 18 de agost 1342. La dlieja fova dlongia la capela de Sant’ Ana te curtina. Funzions o Mësses fovel ntlëuta mo nia tan suvënz ntan l’ann, prevesc da oradecà, n iede de Albions y pona de Laion, univa a tenì la funzions dantaldut tl tëmp de avënt y de cuareisma. S. Cristina fova la prima dlieja te Gherdëina a avëi n preve ntan dut l ann che a scumenciamënt dl 1400 se cruziova nce dla cura dl‘ anes a Urtijëi. Tl vedl urbar iel scrit che bel tl 1430 univel te dlieja de S. Durich liet truepa mësses y gran mësses n ucajion dla festes. I prevesc univa da Santa Cristina y dala pluania de Laion. La dliejes de Gherdëina fova ntlëuta sota la pluania de Laion.

L luech de Urtijëi cresciova for deplù, nsci tl l’ann 1652 iel unì damandà al vëscul de Persenon sce Urtijëi pudëssa avëi n preve nstës y chësc ti ie pona unì cunzedù dal vëscul che a mandà a Urtijëi l benefiziat de Santa Cristina Richard Troi de Fedom. L‘ann 1655 iel unì numinà prim curat de Urtijëi y 10 ani do ie la dlieja de San Durich de Urtijëi deventeda na curazia. Cun ël iel unì scumencià tl 1754 a scrì ti registri chëi che nasc, che se marida y che mor y nce chëi che vën batejei y cunfermei.

Cun l passé di ani fova la vedla dlieja de San Durich massa pitla per l luech de Urtijëi. Sota l curat Johann Anton Runggaudie iela tl ann 1744 unida zareda ju y fata su plu granda tla medema luegia. Ai 28 de agost 1749 ie la nueva dlieja unida benedida dal vëscul Graf Leopold von Spaur a unëur dl trëi rëiesc y de San Durich. Chësta dlieja ne a nia abù vita longia, pernan che la fova fineda ie tumà ite l revëut de dlieja y do che l ie unì fat su da nuef, scumenciovel bel a tré sfëntes. L’ann 1790, per rejons de segurëza, an messù jì te dlieja de San Antone a tenì la funzions liturgiches, ma la dlieja de San Antone fova per Urtijëi massa pitla.

 

 

Proiet dla vedla dlieja de San Durich te curtina zareda ju tl 1793

 

La dlieja nueva

Nsci se à giaurì la descuscion sun l daunì dla dlieja de San Durich. Tl luech fovel doi sortes de minonghes. La pert dla jënt che stajova sun Chël Piz che ulova fé su danuef la dlieja te curtina y da l’autra pert chëi che fova per la fé su plu tl zënter de Urtijëi. Ala fin ie unida tëuta la dezijion de fé su la na nueva dlieja sun Col da Bugon, puscion de Dominik Mahlknecht (L Pana) che à da ca l avëi per la fé su y judà nce ala finanzië, coche l ova mpermetù dan ora.

L’ ann 1793 ie nscì unida zareda ju la dlieja te curtina y n à metù man de scumencé la dlieja nueva de San Durich.  L curat a Urtijëi fova te chël tëmp Kaspar Kostner de Curvea, ël à sapù da nvië via y da mené inant i lëures fac dala firma dl Tirol Joseph Abentum. La descuscions y nce stritoc danter la jënt de Urtijëi ie prësc stai desmincei y duta la populazion à laurà pea sciche la furmies, nce la dumënies judova ëi, ëiles y nce mutons a mené adalerch sablon, sasc y leniam. De autonn dl 1796 fova nscì la dlieja fineda y ai 16 de utober iela unida giaurida cun gran festejamënc y cun la Mëssa nevela dl primiziant Josef Andelan. Ai 5 de setëmber dl 1797 ie la nueva dlieja de San Durich unida benedida dal vëscul de Persenon Karl Franz von Lodron. L ’ann 1799 ie unì fat l gran autere dal artist de Milan Stampa. Artejans da tlo a fat i banc de dlieja, la canssla y stuei da pisté y autri mëndri lëures. La cianceleda de miermul ie unida fata l’ann 1847.

 

 

La dlieja de S. Durich dan che vën juntedes la capeles	Ntan y lëures de fabriché la capeles

 

La capeles, ngrandimënt dla dlieja 1905/1907

A scumenciamënt dl 1900, do passa 100 ani che la dlieja ie unida fata, fova la populazion de Urtijëi aumenteda dl dopl a 2000 persones. La dlieja de S.Durich ne pitova nia plu lerch a duc. Curat de Urtijëi fova ntlëuta Franz Anderlan y l’ann 1902 ie Urtijëi deventà la prima pluania de Gherdëina. Seniëur Franz Anderlan ie unì metù dal vëscul pluan de Urtijëi. Riesc se al tëut su l mpëni de ngrandì la dlieja juntan doi capeles per pert, chëla dl Sacro Cuer de Gejù y chëla dla Madona dl Rosar. I proiec a fat bera Josef Rifesser da Stufan, che a cialà che la capeles passenea cun l stil dla dlieja. La capeles ie nsci unides fates danter l 1905 al 1907 y la jënt dl luech a inò judà dassënn paian doi terzi dla spëises.

Autri lëures

Tl ann 1963 ie unì fat l prim mplant de amplificazion te dlieja y dl 1966 l mplant de sciaudamënt. Cun chisc lëures ova metù man l pluan Josef Pavlič, che ie stat pluan y digan dal 1962 al 1989. De gran lëures de ressanamënt dla dlieja dedora y dedite ie unic fai danter l 1982 y l 1986. Nsci  ie unì curì l tët danuef cun scintles de leresc y depëntes la muredes dedora via. N gran lëur ie stat chël de cumedé su l ciampanil. Dl 1984 iel unì metù man de depënjer nce la dlieja dedite. N gran lëur de pazienza y savëi a jì do ala pitures di revëuc dla dlieja tamez y duta la decurazions ntëur via. Do la dlieja tamez an mo tëut ca a depënjer i revëuc dla capeles cun de nueva pitures, che dant fova me de culëur blanch-grisc. A fé la pitures ie unì nciarià l artist Sebastian Pfeffer de Mittewalt dl Bayern che tl 1985 a depënt la doi cupules dla capela dl Sacro Cuer y l ann do dla capela dla Madona dl Rosar. Dl 1996 ie unì mudà ora te dlieja l sistem de sciaudamënt a zirculazion de aria ciauda cun l sciaudamënt tres l fonz. L’ann 2013 iel unì fat lëures de derturazion dl ciampanil y sun la plaza dan jegher iel unì giavà su per ngrandì l local sota tiera per meter i servijes saniteres per la dlieja. N chël ann iel nce unì fat da nuef l mplant de amplificazion te dlieja.

La ciampanes

Pra la nueva dlieja de San Durich ie unides metudes su n la ciampanes dla vedla dlieja de San Durich te curtina che fova unida zareda ju. Tl ann 1867 n iel unì metudes su de nueves, ma chëstes ie ntan la prima viera mundiela, ti ani 1917/18 unides tëutes ju per les dleghé y fé ermes dainora. Me la plu pitla ciampana ie resteda sun ciampanil. Nsci tl 1920 iel unì lascià fé trëi ciampanes nueves y trëi ani do ie unides fates l’autra trëi. Chësta nueva ciampanes ne ie nia restedes giut sun ciampanil pervia dl stlet tonn y che les ne acurdova nia a suné adum. L pluan Engelbert Comploi a pona dl 1934 lascià fé la ciampanes che mo ncuei audion sunan. Dl 1946 an metù a jì che la ciampanes sona a lectrisc.

 

 

 

L orgun

L prim orgun dla dlieja nueva de San Durich ie unì fat prësc do che i à finà dla fé su tl l’ann 1798 da Benedikt Griesser y Michael Schultes de Ottobeurn cun 23 registri y à custà 1300 Gulden. Tl ann 1910 ie unì mudà ora l vedl cun n nuef dla firma Behang de Vorarlberg da 25 registri al priesc de 2000 Kronen. Avisa 100 ani do dl 2010 ie unì fat l nuef orgun cun 31 reghistri y da 2000 pives dala firma Pirchner de Steinach am Brenner. La lunghëza dla pives va da 2 cm a 5 m. Per avëi la drëta lerch per l orgun nuef y nce per l cor de dlieja y l‘ochestra, iel stat debujën de zaré ju la pitla porica dl cor. Dan ora iel stat critighes da pert de persones dl luech che fova nia a una che l vën zareda ju la porica per fé l orgun nuef, pervia che l va perdudes la lueges te dlieja ulache trupa jënt va su per tò pert ala funzions de dlieja. Ala fin ie stat l digan Vitalis Delago che cun l sustëni dla maiuranza dl Cunsëi de Pluania a tëut la dezijion de lascé fé l orgun nuef coche udù dant tl proiet. Canche duc i lëures ie stai finei fova la gran pert dla jënt cuntënta dl lëur che ie unì fat y la jënt a nce judà a finanzië la terza pert dla spëises. Cun i cuntribuc sëuraprò dla man publica y de istituzions privates, iel stat puscibl de curì duta la spëisa de 680.000 €.

Rafigurazions artistiches te dlieja

Belau duc i lëures te dlieja fac tl lën sciche i auteresc y autri lëures da marangon, i sanc, relieves, urnamënc, y nce  lëures da moler y da nduradëur ie unì fac da artisć y artejans da tlo. La dlieja de S. Durich ie cunsacreda a l‘ epifania dl Seniëur, nsci tamez al gran autere luna ora la bela pitura di trëi rëiesc depënta l’ann 1888 da bera Sepl Moroder da Jumbierch. A man ciancia y man drëta iel la statues de San Durich y de San Wolfgang fates da Johann Dominik Demetz dl 1890. Dan autere tl presbitere iel i cater vangelisć de Johann Dominik Mahlknecht da Rainell y la statues de S. Piere de Rudolf Moroder de Lenert y de San Paul de Ludwig Moroder dl Mëune.

 

 

Pitura dl epifania dl Seniëur	S. Durich patron dla dlieja

 

Sun i doi mëndri auteresc dan cianceleda, chël dla Madona y de Sant Ujep, a Śepl Moroder da Jumbierch ziplà la Madona y Franz Demetz Sotria a fat l Sant Ujep. Tl tëmp da Nadel vën uni ann metuda ora permez al autere de Sant Ujep la bela cripl de zirm de Julius Perathoner de Caio zipleda tl ann 1978. Dlongia l medem autere jan dl viers dla capela de Sacro Cuer, su per la gran seva iel metuda la gran statua senteda de San Durich, vëscul de Augsburg y patron de nosta dlieja. N bel lëur fat da bera Ludwig Moroder, che plu dagiut univa purtà n pruzescion la segra de Urtijëi. Da l’autra pert dla canssla iel la gran Madona cun bambin de Dominik Mahlknecht. Cialan su pona ai revëuc dla gran dlieja possen cunscidré la bela pitures di revëuc fates dai fredesc de Dispruch Franz y Josef Kirchebner. A zapé te dlieja iel a man drëta n bel crist ziplà Franz Runggaldier da Nevaves che a ënghe ziplà l crist dl sepolcro che vën metù ora tla capela dl Rosar n vënerdì y la sada santa. A man ciancia ie la statua dla Madona dl dulëur zipleda da Śepl Moroder da Jumbierch.

 

La gran dlieja	La pitures di reveuc

 

L autere dla capela dla Madona dl Rosar vën ora dla berstot de Josef Rifesser da Stufan. Josef Mersa a ziplà la grupa dla Madona dl rosar cun San Dominich y Anton Insam dl Galina a fat la Santa Rosa. De Jakob Crepaz da Maidl ie la S. Elisabeta y l tabernacul cun a man drëta y ciancia i doi biei angiuli. I doi relieves daujin ie ziplei da bera Albino Pitscheider de Menza. Tla capela iel mo la statues sun n pustamënt che n iede univa purtedes n pruzescion, nsci l „pitl San Durich“ fat da Ludwig Moroder, daujin Sant’ Ana cun Maria fata da Anton Pitscheider de Menza y mo S. Flurian, l patron di destudafuech. Sun l parëi dla gran seva iel n Crist de Vinzenz Peristi. Tamez tla capela possen udëi a man ciancia sun mureda iel la Sant’ Agnes cun la biescia fata da Luis Kostner da Stlejuc. Plu inant tl cianton dlongia autere ie da udëi la bela grupa dla Santa Elisabeta cun l pëtler de bera Rudolf Moroder de Lenert che l à ziplà cun 21 ani. Cun chësc lëur al venciù la bedaia de or ala mostra mundiela de Paris tl ann 1900.

Tla capela dl Sacro Cuer de Gejù ie unì fat l autere da bera Giuani Stuflesser de Petlin y nce la doi statues de San Giuani Batista y Santa Monica. L gran S. Cuer de Gejù tamez ie unì fat da L. Canins. I doi reliefs a man drëta y a man ciancia dl tabernacul a ziplà Batista Moroder da Jumbiërch. Tla capela iel mo autra doi statues sun pustamënt, nsci Sant Ujep cun Gejù da pitl de Ferdinand Demetz dla Cademia y n Sant Angiul custode ziplà da Vigil Dorigo. Tamez ala capela iel sun la doi muredes per pert na statua de San Franzësch de Assisi de Batista Moroder da Jumbierch y da l’autra pert na Santa Elisabeta de Anton Demetz da Pilat. A man drëta dl autere iel sun mureda n cheder cun l pultret a uele de Sant Ujep Freinademetz depënt da Bruno Perathoner de Caio dl 1975,  l ann che Ujep Freinademetz ie deventà beat. L miscioner da Oies ie nasciù l ann 1852 y mort tla Cina tl 1908 y ie unì detlarà sant da Papa Giuani Paul II tl 2003. S. Ujep Freinademetz ie l prim sant Ladin y dl Südtirol.

 

Santa Elisabeta de  Rudolf Moroder de Lenert	Madona de Josef Moroder Lusenberg