La reforma dla diozeja tl 1818 ova purtà mudamënc ti decanac, tla diozeja de Persenon y ënghe tl raion de Trënt. Tl 1822 ie Gherdëina ruveda pra l decanat nuef de Ciastel.
Ai 19 de jené dl 1949 ie unì metù su n decanat nuef, spartì da chël de Ciastel, che a giata l’inuem “San Iacun te Gherdëina”, bonamënter per ti fé unëur ala dlieja plu vedla dla valeda.

L decanat de Gherdëina ie nsci metù adum dala pluanies de Bula/Runcadic, Urtijëi, Santa Cristina y Sëlva. L prim digan de Gherdëina ie deventà l pluan de S. Cristina Friedrich Moroder de Urtijëi. Do ël ie deventà digan tl 1973 l pluan de Urtijëi Joseph Pavlic y tl 1989 ie seniëur Vitalis Delago deventà digan. Dal 2010 ie l pluan de Urtijëi Vijo Pitscheider l digan de Gherdëina.

Sun dejidere di pluans y prevesc dla doi valedes ladines dla diozeja de Gherdëina y Badia, di cunsëies de pluania de duta la pluanies y di doi Digans seniëur Vijo Pitscheider  de Gherdëina y seniëur Jakob Wendelin Willeit de Badia, ie nsci i doi Decanac y la doi Unions Pastureles (Decanat de Gherdëina y Union Pasturela Gherdëina y l Decanat y la Union Pasturela de Badia) unii metui adum a cunlauré sota la denuminazion de „Union Pluanies Ladines“.

 

I Digans Vijo Pitscheider y Jakob Wendelin Willeit adum al curadëur d‘anes Raimund Perathoner ntan la gran Mëssa tl dom de Persenon n ucajion dl pelegrinasc dla pluanies Ladines a Persenon