La dlieja de San Iacun ie la plu vedla dlieja de Gherdëina y ie unida fata su tl ann 1181. Sun ciampanil iel la scrita 1181. La ie a mez al bosch sëura l luech da Sacun, ulache l passova n iede l Troi Paian. L luech da Sacun fova tl tëmp dl Medieve l zënter de Gherdëina. La dlieja ie unida numineda l prim iede te na lëtra de ndulgënza dl 18 de agost 1283. L vëscul Aegidius de Aemonia (Laibach) ti à cunzedù ai credënc 40 dis de ndulgënza sce do se avëi pistà vai mo cun devezion a vijité la dlieja de San Iacun.
Da chël che ie unì documentà, ie la dlieja unida fata su tl 13ejim secul da Jacob von Stättenecke. Plu dessegur al ngrandì la dlieja da dant y la à cunsacreda a San Iacun. Na lijënda conta che Iacun von Stättenecke dëssa vester jit n pelegrinaje cun si genitores a Santiago de Compostela tla Spania, ulache ël ie ngiustamënter unì cundanà a mort. Canche l grof dla Galizia à audì de chësc y à udù ite si inuzënza, ti al lascià do la cundana. Per rengrazië dla fertuna abuda à Iacun lascià fé su la dlieja de San Iacun.

 

 

Aldò de vedli documënc iel ala fin dl 14ejim secul vardù ju l tët de dlieja y do chël iel unì fat su da nuef cun y elemënc tipics dl tëmp gotich. Plu inant ie la dlieja plu suvënz unida dertureda su, l ultim iede tl 1989 dala cumpania di Scizeri de Urtijëi.

L prim stil dla dlieja fova chël romanich, ncueicundì iela dedora via tl stil gotich, dedite iela tl stil gotich y baroch. L bel autere ie unì fat dai fredesc Vinatzer da Pescosta. La plata depënta a mez al autere de Franz Sebald Unterberger ie na copia dl uriginel che ie tl Museum de Gherdëina. Nce la statues baroches urigineles y l drap dla pascion che fova n iede te dlieja ie da udëi tl Museum. Dedora da autere tl presbitere a man drëta y man ciancia iel da udëi doi auteresc baroch. De gran valor artistich ie la pitura a frësch dl 15ejim secul dedora sun dlieja, che reprejentea San Cristoforo cun Gejù Bambin. Viadò sun la pitura iel da udëi motives che conta dl viver da uni di y ulache n vëija nce l ciastel Stetteneck y la dlieja da Sacun. Sul cor iel pitures a frësch depëntes da Leonhard von Brixen dl tert baroch.

La mëndra y plu vedla ciampana dla dlieja, fata dal moster Manfredinus tl 14ejim secul, mienen che l fova la ciampana dla capela dl ciastel Stetteneck, che n dij che la ie unida giaveda ora dai corni de n manz tla bujes de Pincan. Do chël ai metù su la ciampana te dlieja da Sacun. Ntan la prima viera iela unida danejeda y nsci an pensà de la mëter sun la Capela di Tumei che ie sun Plaza de San Durich per lecurdé i tumei. Al didancuei iela da udëi tla Cësa de Cultura de Urtijëi y per la Capela di Tumei iel unì metù su na copia de chëla ciampana.

 

L drap dla pascion	Fresco de San Cristoforo sun la mureda dedora