“Cialé de cunëscer i sënies dl tëmp y i nterpreté aldò dl vaniele”, chësta ie una dla cosses de majera mpurtanza che se damanda l cunzil vaticanum II bele dan plu de 50 ani (GS4).

Te chisc 50 ani se à mudà truep tla dlieja: la bona tradizions an cialà de mantenì, ma nce truep de nuef ie unì docà. Per vester boni de mantenì viva nosta dlieja, vala de bujën che i laics tole pert ala vita dla pluania. Tres la ciarestia de prevesc te nosta Diozeja an udù ite che la và de bujën de strutures nueves per vester boni de tenì su nce per l daunì na vita pasturela te duta la pluanies. Metan adum de plu pluanies che ie tla medema situazion y che à plu o manco i medemi bujëns se sparaniun truepa forzes y n possa fé truep deberieda. I laics muessa tlo se sëurantò na gran respunsabeltà. Me tres n gran sustëni da pert di laics pudran garantì che la cura dl’anes vede inant tla pluanies.

Tres l decret dl Vescul di prims de jené dl 2012 ie unida metuda su la Union Pasturela Gherdëina, de chëla che fej pert Urtijëi, Bula y Rucadic, Santa Cristina y Sëlva. Chësta Union nes dà la chance che cun l aiut dl Spirit Sant abinun troies nueves tl’evangelisazion, tla vita pasturela dla pluania cun si mumënc nce de festa. Chësta Union ie unida njinieda ca per trëi ani alalongia y sën vëniel pità regularmënter scumenciadives, azions y festes a livel de dut l Decanat. Var per var muessa la jënt crëscer y se adaté a chësta situazion nueva, sentì y lascé pro che zeche se mude tl Decanat. Uni cristian dëssa tò pert ativamënter ala vita dla pluania, aldò de si talënc y de si puscibelteies.

Tl daunì muessa se mantenì la vita pasturela tla singula pluania dassëula. L cunsëi de pluania, l cunsëi aministratif, l cor de dlieja y l’autra lies y grupes tla pluania fajerà inant si atività a bën dla pluania. La festes y i sacramënc ne pudran per via di puech prevesc nia plu tenì sciche mo al didancuei. La catechesa di sacramënc, l lëur cun i pitli y cun i jëuni, i cursc per l crëidum y l lëur caritatif unirà lià ite te na rë a na maniera che la singula pluanies vënie sustenides te si lëur. N cialerà de mëter a jì puscibilmënter proiec che va sëura i cunfins dla singula pluanies ora a na maniera che n sparania forzes y scioldi.

L Cunsëi dla pluanies dl’Union Pasturela Gherdëina ie metù adum da chësta persones: dal Digan Vijo Pitscheider, da d’autri prevesc o diacons,  dal’assistënta pasturela y da doi rapresentanc de duta la pluanies. La singula pluanies ie ublighedes a se tenì ala deliberes dl cunsëi dla pluanies. Dal prim de setëmber dl ann 2013 lëura la assistënta pasturela Maria Delago a tëmp plën tla Union Pasturela Gherdëina; si lëur ie dantaldut chël de acumpanië y ti judé ai jëuni sun si strëda dl svilup persunel. L Cunsëi dla pluanies y l Cunsëi de pluania dura medemo giut.

Dal 2016 fej pert chësta persones di Cunsëies dla pluanies:

Muderadëur: Seniëur Vijo Pitscheider Digan
Prevesc: Seniëur Pire Clara, Seniëur Raimund Perathoner, Seniëur Johann Tscholl, Seniëur Vitalis Delago
Per Urtijëi: Georg Kostner – presidënt, Claudia Perathoner Mussner – vize presidënta
Per S. Cristina: Doris Perathoner, Alexander Kostner
Per Sëlva: Elfriede Rifesser Demez, Augustino Senoner
Per Runcadic: Florian Perathoner, Lotte Hofer
Per Bula: Hubert Mayrhofer, Johann Goller

Proiec y scumenciadives dla Union Pasturela Gherdëina (suvënz adum cun i cunsëies dla pluanies)

Di dla Union Pasturela
Nuet longia dla dliejes
Festival dla jeunëza
Trasmiscions sun tematiches dla religion
Ajurnamënt, discuscions y mëises turondes…
Liber dla prieres per la families ajurnà y adatà ai bujëns nueves